24 հունիսի, 2015թ., գ. Դդմաշեն, Գեղարքունիքի մարզ, ՀՀ: ՎիվաՍել-ՄՏՍ-ի գլխավոր տնօրեն Ռալֆ Յիրիկյանը, ընկերության աշխատակիցները և Հայաստանի «Ֆուլեր Տնաշինական Կենտրոնի» թիմը Գեղարքունիքի մարզի Դդմաշեն համայնքում մասնակցել են Մելիքյանների ընտանիքի կիսակառույց տան շինարարությանը: Այս անգամ թիմը ծեփամածիկով հարթեցրել է տան պատերը:
Մելիքյանների ընտանիքը մեկն է այն 40 երջանիկ օջախներից, որն այս տարի ՎիվաՍել-ՄՏՍ-ի ֆինանսավորմամբ, «Ֆուլեր Տնաշինական Կենտրոնի» կողմից իրականացվող բնակարանաշինության ծրագրի միջոցով՝ վերջապես բարեկարգ տուն կունենա:
Ընտանիքի մայրը՝ Լեյլա Առաքելյանը, տարիներ շարունակ փայփայել է տուն ունենալու բաղձալի երազանքը, սակայն, հանգամանքների բերումով, քսան տարի է անցել նպատակն իրականացնելու համար:Ընտանիքը մի քանի տարի ապրել է Լեյլայի ամուսնու՝ Ջումշուդի ծնողների տանը, ապա վարձով՝ Սևան քաղաքում, այնուհետև՝ շուրջ 15 տարի, ազգականներից մեկի հողամասի վրա տեղադրված վագոն-տնակում:Ընտանիքին միայն տասը տարի առաջ է հաջողվել գնել կիսակառույց՝ միայան պատեր և ծածկ ունեցող այս տունը: Մեկ տարի առաջ Մելիքյանները կարողացել են երկու սենյակ առանձնացնել և վագոն-տնակից տեղափոխվել կիսակառույց տուն:
«Բոլոր այս տարիներին երազել եմ տան մասին: Տղաներս իրենց ողջ կյանքի ընթացքում չեն զգացել ամուր տանիք ունենալու բերկրանքը: Անհնար է նկարագրել, թե ինչ է նշանակում վագոն- տնակում ապրելը: Տղաներից մեկը՝ Տարոնը, 2014թ-ին առաջին անգամ Ամանորը դիմավորեց քարե տանը: Արամը՝ մեծ տղաս, այդ ժամանակ բանակում էր: Չեմ կարող նկարագրել այն երջանկությունը, որն այժմ զգում եմ: Երախտապարտ եմ բոլոր նրանց, ում աջակցությամբ, այսքան տարիներ հետո, հնարավորություն կունենանք ապրելու կենցաղային բավարար պայմաններում»,- ասել է Լեյլա Առաքելյանը:
ՎիվաՍել-ՄՏՍ-ի և «Ֆուլեր Տնաշինական Կենտրոնի» համագործակցության շնորհիվ՝ հանրապետության տարբեր համայնքների 53 ընտանիք ապահով կացարան ունի: Տարեվերջին բարեկարգված կամ կիսակառույցը ավարտին հասցրած ընտանիքների թիվը կհասնի 93-ի:
«Գյուղի զարգացմանն աջակցելը մեր ընկերության ուշադրության կենտրոնում է՝ հաշվի առնելով ուրբանիզացման բարձր տեմպերը: Հայաստանի համար գյուղական ենթակառուցվածքների զարգացումն էլ ավելի կարևոր է՝ գյուղական շրջաններից արտագաղթը հնարավորինս նվազեցնելու տեսանկյունից: Հայրենյաց հողում արմատներ գցելու, գետնին ամուր կագնելու, ապագային լավատեսությամբ և հավատով նայելու համար հողի մշակը չպետք է ունենա տանիքի խնդիր: Ուրախ ենք այստեղ գտնվելու և Մելիքյանների երկար փափագած երազանքը համատեղ ուժերով իրականություն դարձնելու համար»,-ասել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:
«Ահավոր է, երբ երջանիկ մանկություն վայելելու փոխարեն, ընտանիքի երեխաներն իրենք են ապրում տնազրկության հոգսով: Այս ընտանիքի երեխաներն իրենց մանկության ընթացքում տուն չեն ունեցել, բայց գոնե երիտասարդությունը կվայելեն նորմալ կենցաղային պայմաններում»,-ասել է Հայաստանի «Ֆուլեր Տնաշինական Կենտրոնի» նախագահ Աշոտ Եղիազարյանը:
Հիշեցնենք, որ ծրագրի իրականացման համար ՎիվաՍել-ՄՏՍ-ը 100 մլն. ՀՀ դրամի ներդրում է կատարել (2014թ-ին` 55մլն դրամ), իսկ Հայաստանի «Ֆուլեր Տնաշինական Կենտրոնը» իրականացնում է ծրագիրը:
ՎիվաՍել-ՄՏՍ-ը (Ղ-Տելեկոմ ՓԲԸ) Հայաստանի շարժական կապի առաջատար օպերատորն է, որն ունի ամենահզոր 2G/3.75G/4G ցանցը և տրամադրում է ձայնային և տվյալների փոխանցման ծառայությունների բազմազան տեսականի` Հայաստանի ամբողջ տարածքում: Գործունեության հիմք ընդունելով իր բաժանորդների շահերին լավագույնս ծառայելը, հիմնադրման օրվանից` 2005թ. հուլիսի 1-ից, ՎիվաՍել-ՄՏՍ-ը կարճ ժամանակամիջոցում կարողացել է ստեղծել համահանրապետական ցանց և բաժանորդների մեծ բազա: ՎիվաՍել-ՄՏՍ-ը նորարարությունների առաջատարն է և հետամուտ է ոլորտի բոլոր զարգացումներին` ի շահ երկրի շարժական հեռահաղորդակցության շուկայի: ՎիվաՍել-ՄՏՍ-ն իր գործունեության մեջ առաջնորդվում է ISO 26000 (Սոցիալական պատասխանատվության միջազգային ստանդարտ) և ISO/IEC 27001:2013 (Տեղեկատվական անվտանգության կառավարման համակարգ) ստանդարտներով: Հավելյալ տեղեկություններ ստանալու համար այցելեք www.mts.am
«Բջջային Հեռահամակարգեր» ԲԲԸ-ն (ՄՏՍ) Ռուսաստանի և ԱՊՀ երկրների բջջային կապի խոշորագույն օպերատորն է: Դուստր ձեռնարկությունների հետ միասին կազմակերպությունը սպասարկում է ավելի, քան 100 միլիոն բաժանորդի: Ռուսաստանի բոլոր տարածաշրջանների, ինչպես նաև Հայաստանի, Բելառուսի, Ուկրաինայի և Թուրքմենստանի բնակչությունը, որտեղ ՄՏՍ-ը և իր դուստր ձեռնարկություններն ունեն լիցենզիա GSM ստանդարտներին համապատասխան ծառայություններ մատուցելու համար, կազմում է ավելի քան 200 միլիոն մարդ: 2000թ-ից «ՄՏՍ»-ի բաժնետոմսերը գնանշված են Նյու Յորքի բորսայում MBT ծածկագրի տակ: Հավելյալ տեղեկություններ ստանալու համար այցելեք www.mtsgsm.com
Հայաստանի «Ֆուլեր Տնաշինական Կենտրոնը» բարեգործական հասարակական կազմակերպություն է, որն աջակցում է Հայաստանի և Արցախի հանրապետություններում ցածր եկամուտ ունեցող ընտանիքներին կառուցել և վերանորոգել պարզ, հարմարավետ և մատչելի տներ՝ տալով նրանց երկարաժամկետ, անտոկոս փոխառություններ, ինչպես նաև իրականացնում է տնազոhւրկների շահերի պաշտպանություն՝ դարձնելով այն խղճի հարց և գործելու մղում։ Ամենամսյա ետվճարներից կազմվում է շրջանառու ֆոնդ և օգտագործվում այլ ընտանիքներին աջակցելու նպատակով՝ այսպիսով դառնալով համայնքային զարգացման կայուն ֆինանսական հիմք։ Առ այսօր կազմակերպությունն աջակցել է շուրջ 400 ընտանիքների:
Լրացուցիչ տեղեկությունների համար կարող եք այցելել՝ www.fcharmenia.org կամ գրել fcarmenia@fcharmenia.org էլ հասցեին:
